مطلوب عروسة

بالنسبة لموضوع للصناعه المحلية في العروسة دة فانا مش باشجع الصناعه المحلية الا لما تكون عالمواصفات :

الطول: من 155 الي 163 وماتقوليش اشمعنى 163 اهوة كدة وخلاص وزن العروسة شاملا الملابس والجزمة و الاكسسوارات لا يتعدي ال 63 كيلو وماتقوليش اشمعنى تاني
من حيث اللون: فهوة ابيض فضي لامع ناصع يميل للبياض و يكون براقا وشايني يعني (ماهواش اصفر ولا اخضر ولا شعر ازرق ولا حاجة)
العيون: مش مهم - حيث ان كل بنات البلد لابسة لنسز يعني ممكن نقول رمادي على ازرق بس المهم انها من غير النضارة نظرها مايكونش 6/6 يعني يفضل شيش بيش او شيش ياك
طبعا دة لحكمة انها ماتشوفش حاجة لما تقلع النضارة وللا اللنسز وبكدة اقدر اسحبها وتكوني معتمدة عليا اعتماد كلي ونمشي نحسس ونعتذر سوا
ان تكون العروسة خالية من العيوب يعني ماتكونش حوله ولا رجليها الاتنين شمال
ممكن عرجة او عمشة مش مشكلة كبيرة يعني ولايجوز ارتداء رموش صناعية ولا ضوافر ولا باروكة ولا اي حاجة تانية صناعية اثناء الانترفيو

هذا من حيث المواصفات الجسمية اما من حيث المواصفات العقلية:

تكون العروسة تحمل مؤهل عالي يعني ممكن كدة تشبلون تشجارة وللا صنايع مش مشكلة
ان تكون ملمة باللغه الانجليزية الماما تاما يعني تعرف تكتب اية بي سي دي ولغاية الأف كفاية مانا عاوز عروسة تشرفني ولما تسافر معايا برة تعرف تتعامل مع الناس وبالذات في الفصال مع بياعين السوق وطبعا يفضل الالمام بلغة اجنبية تانية ويفضل خريجي الجامعه الامريكية اللي هيه في ميدان التحرير دي

او يكون معاها ام بي اية او اية بي سي او اي اف جي والافضلية للي عندها خبرة 13 سنة ونص وخمستاشر يوم في اعمال السكرتارية والترجمة و الحسابات و اي حاجة تانية
الايكون سبق لها الحب ولا الخطوبة ولا مشيت مع حد ولا ليها اي علاقات سابقةيعني بت كدة خام داية من ورا

الداموسة
لزمن تكون الهانم رومانسية رومانتيكية رقيقة المشاعر مرهفة الحس السينمائي وبتعيط كدة لما تشوف افلام عاطفية او دراما بس مش افلام البورنو التي يحظر عليها بموجب عقد الزواج مشاهدتها الا في وجود الطرف التاني اللي (هوة برضة المحروس العريس)
ممم تاسعا وهوة المهم ان تكون بتشتغل و محوشة قرشين تتجهز بيهم وتشارك في مصاريف الجواز والفرح (مش الدنيا مشاركة برضة)
و ان تكون قاهرية او سكندرية ولا عزاء للقرويات يا بتوع الارياف
ان تكون بنت ناس كويسين يعني معاهم فلوس ويكونوا طيبين لدرجه العبط يعني ماما وبابا بتوعها مش بيعترضوا على اي حاجة العريس (اللي هوة المحروس أنا)يقولها ولا ليهم اي طلبات من حيث مهر وشبكة و مؤخر واي حاجة يجود بيها المحروس لعريس تبقى فله
ومش مهم شغلانة عمي حمايا موظف ولا تاجر حر ولا حتى تاجر مخدرات المهم انة يكون مستعد لأعالة بنتة وجوزها (اللي هوة برضة المحروس انا)لما يترفد ولا يفلس ولا يتزنق في قرشين
الا يكون في عائلتهاالكريمة اي متهمين في قضايا جنايات او من سبق عليهم احكام جنائية مش مشكلة لو عليهم جنح بسيطة يعني ضرب افضى الي موت او نصب او نشل
معلش ماحنا برضة عائلة كبيرة ولازم نناسب ناس اشراف ومأصلين

بالمناسبة صحيح بخصوص موضوع الصناعه المحلية و "صنع في مصر" دة
العروسة مطالبة انها تقدم مايفيد انها صناعه مصرية 100% و من مكونات محلية وذلك من خلال تقديم شهادة المنشأ و فاتورة الجمارك ويكون مدفوع عليها 10% ضريبة مبيعات (سددت بمعرفة أبوها اللي هوة حمايا يعني)ومايكونش عليها اعادة تصدير ولا واخدة ريجيكتد في الواردات علشان يعني لو حبينا نشحنها في كونتينر على المنطقة الحرة في جبل على اللي هوة في اخر طريق الشيخ زايد دة

لو فية اي بنت من قارئات المدونة شايفة في نفسها المواصفات القياسية المطلوبة ياريت تتقدم بالسي في بتاعها

في موعد اقصاة 21 مارس سنة 2012 قبل الساعه ستة اللا خمسة بالفاكس او البريد الالكتروني

مقابل الرسوم اللي هيه 50 دولار أمريكي ولا عزاء للجنية المصري (اللحلوح مع انة مابقاش بيلحلح ولا نيلة) وبرضة اي شاب كدة لة اخت عانس ولا متطلقة او مترملة ممكن يتبع نفس الاجراءات ويقدملها وذلك فقط في حالة مطابقتها للمواصفات المذكورة اعلاة

ويحق لنا قبول او رفض اي عروسة بدون إبداء الأسباب