عيد ميلادي فات فات وفي ديلة سبع لفات - كل سنة وأنا طيب

عيد ميلادي فات من اسبوعين تقريبا
بابقى فرحان الايام السابقة لعيد ميلادي وحاسس اني مستني اليوم دة
ولما اليوم بييجي وفي اخرة بابتدي احس بالقرف وبالاحباط باحس ان 36 سنة من عمري فاتوا حاجات كتير كان نفسي فيها ماحققتهاش برغم الحاجات اللي حققتها يعني بابص لنص الكوب الفارغ بصراحه اكتر حاجة بتقهرني اني باحس بالوحدة باحس اني وحيد في الدنيا مين بيتصل يقولي كل سنة وانت طيب ماما واتنين اصحابي وخلاص كلمتين وبس على رأي الله يرحمة فؤاد المهندس
عايش وحيد باتفرج عالتليفزيون او عالكمبيوتر ملل وحدة فراغ زهق........أو مزيج منهم كلهم

قد اية كان نفسي في وليفة او حبيبة تشاركني حياتي كلها مش بس اليوم دة حتى لما كنت متجوز عمرها ما اهتمت تقولي كل سنة وانت طيب الهانم بتكرة اعياد الميلاد برغم اانا انا وهيه في يومين متتاليين بتحس انها عجزت وبتفتكر انها اكبر مني وفمش بتحب حد يفكرها باليوم دةدة غير انها كانت من مستوى اجتماعي وثقافي متدني من عيلة بيئة يعني مايعرفوش من الاعياد ومايهمهمش منها الا عيد الفطر والاضحى وغير كدة مش مهم دي اعياد الاجانب الكفرة وعيد الميلاد دة بدعه وكفر والنبي بس اللي نذكرة في المولد النبوي

وعلى كدة اللي بتقول عيد الميلاد كفر وبدعه اول واحدة تجري تقولي بكرة المولد النبوي هات للعيال حلاوة وعروسة لبنتك و حصان لابنك وهوة دة مش بدعه راخر يا ولية تقوللي مش مهم خللي العيال تفرح وتلعب وللا انت بتتحجج يا بخيل و غاوي نكد وخلاص اقولها ياستي اجيب للولد حصان اية بس احنا في القرن الواحد وعشرين حصان اية دة اللي معمول من سكر و اصباغ و مواد صناعية ضارة بالاطفال اية شغل الناس البيئة دة ياستي احنا عمرنا ما جبنا الكلام دة في العيد

لكن تقول لمين اصل العيد في بلدنا الناس بتبقى نوعين فية نوع مابيصدق العيد ييجي علشان يلبس هدوم جديدة و يخرج يروح سينما و ياكل سندوتش شاورمة بيحلم بية طول السنة والعيال تلبس وتلعب بالعروسة والحصان والمراجيح و يروحوا الملاهي ولا يبلونا في الحديقة الدولية اللي جنبنا دي ويقلبوها مزبلة
ماهو على رأي بابا الله يرحمه "الناس اللي مابتخرجش طول السنة هيه اللي بتخرج في العيد" والنوع التاني اللي هوة معظم طبقة المثقفين و المحترمين في بلدنا بيعمل حاجة من اتنين يا اما بيسافر حتة ي شرم ومارينا او حتى اسكندرية او فايد والسخنة يا اما بيقضيها بيت و شوي باربكيو مع زيارات عائلية متبادلة وعزومات عالغداء والشوي

لكن الناس دي مش بتفضل تنزل الشوارع في وسط هوجة العيد اللي لامة العالم البيئة كلهم في الشوارع متأمعين بهدوم العيد و ببريزة في جيوبهم ( وطبعا دة قبل مانسمع عن التحرش والمعاكسات واللي بيحصل في العيد من العالم الواطية دي).

يظهر ان اهلنا كان عندهم بعد نظر للمسألة الطبقية دي في الاعياد دة غير ان العالم الواطية دي الاحتفال بالاعياد عندها (حتى لو كان عيد الفطر اللي هوة بعد صوم رمضان) بيبقى عبارة عن لفة بانجو او سيجارة حشيش او قزازتين بيرة و ربما بنت منحرفة من اللي بيبقوا عندهم موسم شغل في المناسبات دي وخصوصا بعد كساد رمضان

بجد 90 % من شعب مصر بقى عالم واطية وزبالة وبيئة اية القرف اللي احنا عايشين فية دة

هل ياترى السبب الحكومة اللي كابسة على نفسنا وهل لو اتغيرت اللي حاتيجي بعدها حاتكون احسن منها ؟؟؟ ولا دي

بقت سمة شعب متهيالي انها بقت مشكلة شعب مش حكومة الاحسن اننا نرمي شعب مصر في النيل زي البهايم الميتة ونبعت نجيب شعب تاني من الصين شعب يكون متحضر وراقي و ريحتة حلوة

وللا يمكن مانحتاجش لموضوع الرمي في النيل دة لان يمكن الحكومة تبيع الشعب هوة كمان زي ماهي عمالة تبيع في القطاع العام والمصانع والشركات وكلوووو والله سمعت من ناس مسئولين وليهم وزن انهم طلبوا منهم حيث انة الراوي واحد من رجال الاقتصاد انة يقيم قناة السويس و كمان السد العالي علشان الحكومة عاوزة تعرضهم للخصخصة لشركات اجنبية تديرهم و تدي الدولة فلوس ورسوم من ورا كدة تخيلوووووووووو الحكومة بجد ومش هزار عاوزة تدي حق الانتفاع بقناة السويس والسد العالي لشركات اجنبية وتبيعهم لمستثمرين قال اية حايعرفوا يشغلوهم احسن والدولة تاخد فلوسها وهيه قاعدة حاطة رجل على رجل

مش القطاع العام وقناة السويس دول اللي حاربنا علشانهم من سنة 56 واتعرضنا لعدوان الثلاثي بسببهم ولما اترفض

تمويل بناء السد العالي من صندوق النقد الدولي علشان كدة ناصر امم قناة السويس ؟؟؟ مش كدة برضة وللا انا بيتهيالي ؟؟؟ حد يفكرني يمكن انا بانسى وللا باتعاطي مخدرات ومش واخد بالي يعني ممكن نلاقي الحكومة بايعه السد العالي لشركة يهودي تنسفة وتغرقنا وتغرق البلد عاللي فيها وللا يقطعوا عننا النور

الله يرحم كل الناس اللي ماتت وهيه بتحارب علشان الحرية وعلشان اقتصاد البلد ديناس ماتت في 48 وفي 56 وفي 67 وفي 73 ناس ماتوا علشان البلد يبقى ليها اقتصاد وطنى وليها كيان مستقل وكرامة وشوية حاجات تانية صغيرة فوق بعض
النهاردة حكومتنا بتبيع السد القناة للاجانب من تاني وياترى فلوس البيعة دي راحه فين ؟؟؟ على بنوك سويسرا برضة ؟؟؟ وللا اية ؟؟

هما خلاص سرقوا كل فلوس اقتصاد البلد دي لما مابقاش فيها فلوس واتجهوا يبيعوا كل اللي فيها علشان يلاقوا فلوس يسرقوها ماتيجوا نبيع الاهرامات والاثار في المتحف المصري ومعابد الاقصر لشركات اجنبية تديرها وتحصل فلوس اكتر من السواح وتبقى تدي الحكومة نسبة قصدي تدي الحرامية كلة بيسرق كلة يا جدعان البلد ماتت وغرقت ومافضلش غير اننا نصوت عليها و ندفنها