عدنا

بعد انقطاع عن التدوين في الفترة السابقة كنتيجة لحالة من الاحباط و الاكتئاب
اصابتنا منذ التعديدات الاسطورية .... عدنا
ونعتذر لكل الاخوة والاخوات البلوجرية و البلوجريات ممن علقوا على البوست الاخير
لعدم ردنا في وقتها و نشكرهم على اهتمامهم وتعليقاتهم

دلوقتي بقى انا مش عارف انتوا زعلانين لية وعاملين الهوجة دي على موضوع تعديلات الدستور و موضوع التوريث

اشمعنى دلوقتي فوقتوا و عاملين الغاغة دي

هي جت على رئيس الجمهورية يعني

ماكل البلد عمالة تورث كل حاجة

نص الممثلين والمطربين هم ابناء و بنات الجيل السابق من الممثلين والمخرجين و المغنيين والمذيعين
أمثلة:
رامي إمام أبوة مشغللة مخرجين موهوبين يظبطولة الشغل و الامضاء في الاخر بإسمة, دنيا سمير غانم لا بتعرف تتكلم ولا تمثل و لا حتى يطلع منها صوت أدمي (من غير خنفان) يقول انها بتقول جملة مفيدة
وطالعة في ايد ابوها وامها كارت حشر, منة شلبي بنت الرقاصة العفيفة زيزي مصطفى
بتاعه الفنكوش اللي حشرت بنتها في السينما
و بقى المخرجين عمالين يقصوا و يلزقوا في لقطات متفرقة لتجميعا في مشاهد نقول ان الهانم بتعرف تمثل, أحمد الفيشاوي ننوس عين أمة طالع ينونو بصوتة المسرسع
لا هو باين ولا وشة بيدي اي تعبير زي الاهبل بس
والناس اصلا مش طايقاة بعد قصة البت هند الحناوي, محمد عدوية مش عارف عدوية اعتزل بعد حادثة السعوديين و طلعلنا حمادة حامل الرايه, احمد سعيد عبدالغني اثبت بالفعل ان الغتاتة بالوراثة, الواد التخين ابن امين بسيوني اللي حاشرة مذيع في البرامج الدينية
وهو لا شكل و لا علم ولا قبول و لا ينفع الا في حظيرة خنازير, وغيرهم وغيرهم

كل ابناء المستشارين والقضاه هم وكلاء نيابة والمفروض ان القضاء دة أعلى و أنزه وظيفة في الكادرات الحكومية و شاغليها هم من علية القوم ذوي الضمائر اليقظة وفي يدهم ميزان العدل والحق و مهمتهم إنصاف المظلومين و رد الحقوق أصبح همهم توريث الوظائف القضائية العليا لأبنائهم

أبناء دكاترة الجامعه معيدين في نفس الجامعات
واضح ان النبوغ بالوراثة ياللا ماهو كلة تدريس

ابناء ضباط الشرطة الكبار من لواءات ومديرين أمن و مساعدين وزير طلبة في كليات الشرطة و ضباط شرطة
الكفائات تورث و تربية العسكرية برضة بتربي جيل ناشيء يحمل الراية

موظفين الوزارات المختلفة جايبين أبناؤهم وقرايبهم شغالين في نفس الوزارات من مالية وجمارك وضرائب لبترول لسياحة لخارجية من سفراء و قناصل
حتى مصر للطيران و المصانع وشركات القطاع العام والبنوك من مديرين القطاعات ووكلاء وزارات و مناصب عليا مشغلين ولادهم فيها

وأية وأية وأية

وطبعا كلهم ابنائهم من النوابغ اللي تقاريرهم كلها عالية و كفائات يجب ان تحترم و بتتقلد أعلى المناصب و بأقصى سرعه (طبعا قبل ما البابا يطلع معاش ولا يتنقل او يسيب)

طيب أشمعنى بقى .... هيه جت علية

ماتبتدوا بنفسكم الاول يا قوم

انما سلط عليكم من أعمالكم

وإذا كان شيمة اهل البيت الرقص فرب البيت بالدف ضارب
( أضطررنا لقلب البيت ليناسب حالكم يا شعب مصر)

الراجل شايل همكم 26 سنة و شايفكم واحد واحد مأمنين مستقبل عيالكم بشغلانة ووظيفة ميري ياخد منها مرتب و شقة و عربية قسط و من النقابة يفرش بيتة بتقسيط السلع المعمرة و ياخد خط موبايل بيزنس و يطلع يحج و يعمر مع النقابة و يتعالج في التامين الصحي
ومستكترين علية هوة كمان يبص لحال اسرتة من بعدة

مش يمكن لو مات ييجي رئيس تاني يعتقل كل اسرة الراحل ويرميهم في المعتقلات و يلفقلهم تهم ويعدمهم و يسرق البلد وينهبها و يزيل اي اثر او مشروعات سابقه مش قصدنا على محافظ الأسكندرية ولا حاجة بس من العادات الفرعونية المتوارثة من 7000 سنة انة لما فرعون يموت الفرعون اللي ييجي بعدة يشيل الخراطيش اللي بتحمل اسمة من على المسلات والمعابد و يضع غيرها بأسم الفرعون الجديد
و بعدين الخبرة طبعا للي أتربى في بيت رئيس جمهورية و شاف واتعلم كيفية الحكم و طلع من مطبخ سياسي حكيم و شارب السياسة من صغرة

ماهي اي مهنة بتيجي بالممارسة

مين بقى في البلد بيمارس مهنة رئيس جمهورية من 26 سنة و ابنة عايش في البيت طالع نازل شايف السياسة ماشية ازاي

لو فيكم واحد تاني متربي في حجر رئيس جمهورية يورينا نفسة بقى

اقولكم انا لو رئيس الجمهورية اعمل اية علشان أأمن البلد برئيس حكيم مربية على ايدي و فاهم الفولة و يعرف يمشيكم يا شعب غجر ماتمرش فية الجميل اللي انا شيالة من 26 سنةومشروعات و اصلاح اقتصادي و سداد ديون و خصخصة قطاع عام و تحقيق سلام تام لبلد عانت حروب على مدى تاريخها


اولا اقول ان انا عجزت وبلغت سن كبيرة تعبت وصحني مش مستحملة هم الحكم و هموم الشعب وعاوز اتقاعد و بناء علية انا بافتح باب الترشيح لكل من يريد ترشيح نفسة فقط يصلح لذلك دستوريا و حزبياً وفقا لما تم من تعديلات دستورية

و انا أقول و أؤكد اني ارفض اي محاولات للخروج عن الشرعية و عن الدستور وعن النظام كما ارفض اي توريث او غيرةيعني رافض تماماً ان أبني يرشح نفسة للرئاسة

ابني بما انة امين السياسات في الحزب الوطنة (الحاكم) بيرشح نفسة للأنتخابات الحرة المستقلة لرئاسة الجمهورية حقة كأي مواطن مصري حر

وانا أرفض اي دعم او محسوبية او محاباة وأرفض تماماً ان يتولي إبني رئاسة الجمهوريةولكن لا أملك ان احرمة حقا كفلة لة الدستور كأي مواطن مصري حر على أرض الوطن وكعضو و أمين لجنة السياسات بالحزب الوطني

هذا و قد فاز السيد جمال مبارك بنسبة 72% في انتخابات رئاسة الجمهورية و ذلك برغم معارضة والدة الرئيس السابق لتولية الرئاسة من بعدة و لكن شعب مصر قال كلمتة و شباب مصر انتخبوا شاباً منهم ليحمل الراية برغم كل كل الاعتراضات و خرج من وسط الجماهير من رأوة كفئاً لتولي المهمة

السيد الرئيس يستقبل الرئيس الجديد في قصر الرئاسة و يهنئة بالفوز في الأنتخابات الرئاسية و يسلمة مقاليد الحكم

تـــــــمـــــــــــــــــــــت