تاجات

بعد ما تكرر ارسال تاجات لي من اخوتي المدونين
shiko, Esraa, بنوتة من وسط البلد, Mony the Angel
ولو اني ماكنتش بصراحه ناوي اجاوب عالأسئلة دي بس بعد ماتكررت الدعوات فأنا مضطر اجاوب التاجين دول علشان مايزعلوش ويفتكروا اني مطنش البلوجرية العزاز عليا

ايه اللي هيحصل لايميلك لما تموت؟ **
حايموت هوة كمان
بس الاكيد ان ايميل الشغل حايورثوة لحد تاني يقراة ويشوف شغلي و يشتغل علية ويتابعه

اديت الباسوورد لحد قبل كدة؟ **
مرة واحدة اديت الباسورد بتاعه ايميل الياهوو لواحدة كنت باحبها جدا ومرتبط بيها
ودة كان اتفاق بعد الحاح مني اننا نتبادل الباسوردات وكل واحد يشوف التاني بيكلم مين وبيقول اية
وهيه كانت رافضة ومترددة
ولما اخدت باسوردها اكتشفت انها بتكلم كذا حد و كلامها معاهم انها بتحبهم وعلاقتها بيهم من زمان واتضح لي انها مدمنة علاقات عاطفية عابرة, فغيرت الباس ورد بتاعتها وبتاعتي وقعدت كذا يوم استخدم الماسنجر بتاعها واشوف اللي بيتكلموا علية وهيه كانت حاتتجنن وكلمتني كذا مرة تعيطلي اقفل الميل وارجعلها الباسورد, وطبعا انا مكانش على لساني الا يا خاينة يا غشاشة
بصراحه كانت مريضة نفسياً , وبناء علية انا سبتها وقاطعتها بس اثر فيا قوي الموضوع دة ومابقيتش اثق بسهولة في اي واحدة
لأن بعد اكتر من سنة اكتشف انها متعددة العلاقات
وان لم تخرج كلها عن الدردشة وتضييع الوقت وانها بتتسلى وبتمثل

اسمك ؟ **
الحصان الأسود

اسم الدلع المشهور وسط أصحابك؟ **
............. لا يوجد

عمرك ؟ **
هيه الأحصنة بتعيش قد أية؟؟

برجك ؟ **
برج العقرب

مجالك أو مجال دراستك؟ **
درست ادارة الاعمال وباشتغل في تطوير ومبيعات الألكترونيات المنزلية
Consumer Electronics, Sales and Product Management

شخصيتك نوعها ايه؟ **
اللي يجاوب عالسؤال دة اللي يعرفوني كويس مش انا

السفر بالنسبة لك؟ **
باحبة جدا طبعاً
وباسافر كتير
ولو قعدت فترة ماسافرتش بابقى عصبي ومتنرفز مخنوق ومتلهف عالسفر
وقبل ماسافر باكون فرحان و متشوق وقلقان قلق لذيذ

المود بتاعك؟ **
بقى دة سؤال دة؟؟
المود بتاعي امتى دلوقتي ولا قبل ما بتدي اجاوب الأسئلة ولا أمبارح ولما الشهر اللي فات ولا أمتى؟؟
المود بيتغير كل لحظة أصلاً حسب الحالة المزاجية والنفسية و المشاكل او المواقف اللي بنواجهها

وقت فراغك بتعمل فيه اية؟؟ **
وهو على فكرة كتير جدا بس انا بقيت كسلان جدا
باتفرج عالتليفزيون واقرأ المدونات
يعني مابين التليفزيون والنت وغالبا الاتنين مع بعض

الأكلة المفضلة؟**
باموت فى البيتزا والمكرونة البشاميل والسمك المشوي والجمبري اواي لحوم مشوية ومعاها بطاطس مقلية وسلطة طحينة, وباكرة الخضار وبالاخص الكوسة اللي عمري ما ذقتها اصلا

الصفات اللي خدتها من بابا الله يرحمه؟ **
طريقة التفكير و تحليل الأشياء وحب القيادة والأدارة وقوة الشخصية بلا وقاحه والنزاهه وحب الحيوانات والعصبية و للأسف عدم الألتزام الديني والتدخين بشراهه وحب الهدوء و الحاجة اللي ماخدتهاش منة هيه الاسراف او التبذير ان كنت غير بخيل بس غير مسرف

الصفات اللي خدتها من ماما؟ **
مش كتير بس الطيبة لدرجه السذاجة احيانا و رقة الاحساس و سرعه التأثر بالمواقف و الحساسية المرهفه

أكتر 6 حاجات بتكرهها؟ **
الإزعاج والدوشة.
الغباوة او الاستغباء اوالاستهبال والتناحة والبرود
الخبث و الغش والمكر والخديعه
صوت بوق القطار و صوت عواء كلب بالذات الجرو واكرة من يعذب الحيوانات او يؤذيها
الأهمال والتفريط في الممتلكات والحقوق وبالذات الاهمال في استعمال الاشياء الخاصة وعدم العناية بها مثل الموبايل والكاميرا والريموت و الاجهزة المنزلية
أكرة النفاق و الاستغلال واكرة المحاباة والأحزاب في العمل والرئيس الذي يحابي بعض الجهلة التنابلة الاغبياء المنافقين على حساب من يعملون
ناس تشتغل ولا تكسبش وناس تكسب ولا تشتغلش" على رأي الراحل اسماعيل ياسين"

أكتر 6 حاجات بتحبها؟ **
بنتي حبيبة ابوها
الحيوانات الصغيرة القطط والكلاب
عربيتي
احب البنت الرشيقة الرقيقة الهادئة الصعبة والمعتزة بنفسها
النجاح والانجاز وتحقيق الاهداف
الشاطيء والبحر والهدوء مع انسانة لا أملها و كأس لا تفرغ وسيجارة لا تنطفيء

الشغل بالنسبة لك؟ **
المستقبل والفلوس

ايه الكمبيوتر والانترنت بالنسبة لك؟ **
حياة ووقت فراغ وبرضة الشغل

أمرره لمين؟؟؟ او بمعنى اصح ارازى بيه مين؟
ولا حد
اللي عاوز يجاوبة يتفضل اهلا وسهلا
واللي مايحبش بلاش
انا راجل طيب وماحبش ازعج ولا احرج حد