الاثنين، 21 سبتمبر 2009

مشكلة الانترنت و الإستخدام العادل

انا من رأيي ان دلوقتي الشبكات المنزلية اللي كل واحد عامل من اشتراكه 30 وصلة لجيرانة و صحابة اللي حوالية و بياخد من كل واحد فيهم 30 جنية مثلا و بالتالي بيحصل مكسب 300% من اشتراك الDSL بتاعه بقت سرقة علني و دي خسارة كبيرة على مقدمي الخدمة و مش فايدة كبيرة للمستخدم لانة بيتحمل بطء و خنقة كثرة المستخدمين و المستفيد الوحيد هو اللي بيأجر شبكتة لجيرانة و يلم منهم 3 او 4 اضعاف اشتراكها

و 75% من اللي عندهم انترنت منزلي واخدين من الناس اللي بتوزع شبكاتهم الشخصية باشتراكات مخفضة

يعني دي خسارة على مقدمي الخدمة و مكسب كبير للي عاملين شبكات بتكسبهم اضعاف مضاعفة و في الاساس فية شرط في كل عقود الاشتراكات يمنع استخدام الاشتراك في شبكة منزلية لكذا مشترك بدون علم الشركات

يعني بصراحه كدة دي سرقة, و خسارة كبيرة جدا للشركات اللي سايبها خطوط الDSL بتاعتها تكية لكل واحد عاوز يعمل سبوبة, فطبيعي جدا الحل الأمثل في تحديد حجم استخدام يكفي المستخدم العادي و يقطع كل الشبكات دي
و 25 جيجا المتحددة دي كتير جدا جدايعني شوف تطلع مثلا تحميل كام فيلم 350 ميجا في المتوسط حيث ان فية افلام من اول 250ميجا و طالع تخيل انها تحمل 72 فيلم في الشهر

يعني لو الكمبيوتر مفتوح 24 ساعه بيعمل DownLoad افلام مش حايلحق يحمل ال 72 فيلم طيب نقول ان حضرتك حاتحمل كل يوم فيلم و دة طبعاً مستحيل ان يوزر بيحمل 365 فيلم في السنة و يتفرج عليهم الا لو ماوراهوش غير الافلام......المهم ان 30 فيلم في الشهر مش حاتاخد نصف ال 25 جيجا و الايميلات و الفلاشات و غيرها و غيرها عمرها ماتعمل اكتر من 2-3 جيجا في الشهر بالكتيرطيب يبقى الشبكات محددة مستوى عادل جدا للاستخدام للشخص او للكمبيوتر الواحدو لكنة حايكون ناهي لموضوع الشبكات المنزلية المتعددة المستخدمين
و الاحسن ان اللي بيدفع 40 جنية و يتحمل بطء و رزالة شبكة فيها 30 -40 مستخدم يدفع 95 جنية و يشترك لشبكة لنفسة محدش يشاركة فيها

مش كدة وللا ايــــــة........... على رأي المرحوم فؤاد المهندس

حرب الكواسيس (حرب الجواسيس)

في العادي انا مش متابع جيد للمسلسلات الرمضانية
اليوم قصير بين العمل و الافطار و الصلاة و التراويح لسويعات قليلة للنوم
لكن شاء حظي العاثر ان اشاهد حلقتين او ثلاثة من هذا المسلسل الممطوط الممل المليء بالمهاترات و الاخطاء برغم انة من الواضح انة تم الصرف علية بانتاج بذخ لكن ربما تم تصويرة في عجالة اتلفت الحبكة الفنية و الدرامية و ظهر كمسخ :
1- شلومو (أبو سليم) مبدئيا شكلة لا يصلح ابداً ان يكون يهودياُ لا بالشكل و لا اللكنة
ربما سوري لبناني ليبي او شيف مطبخ خليجي لكنة غير مقنع كقائد مجموعه في الموساد الاسرائيلي

2- منه هانم شلبي كالعادة وجه يخلو من اي تعبيرات و عيون لا تستطيع التعبير عن اي انعكاس او مشاع
ر
, مهما اكثرت من الكحل لكنها تبدو كعيون جريئة خالية من الرموش كعيون والدتها الرقاصة زيزي مصطفى (هما بصتين: بصة المرعوبة و البصة التانيةالجريئة اياها), منة تمثيلها جامد جداً, واحد حافظ وبيسمع مالوش اي انفعالات

3- هشام سليم .... حرام عليك... انت فنان محترم وليك تاريخك الفني و بنحبك لية تعمل دور بالسذاجه دي و مش حاقول اكتر من كدة شوف الدور و اتفرج على المسلسل و انت تندم انك ورطت نفسك, دة لو ماكنتش لسة ندمت

4- لويز عميلة الموساد الجميلة بصراحه مش لايقة عالدور بلونها الاسمرو الشعر الاسود التقيل مع اللنسز الملونة و طريقتها المفتعلة, و وشها ربًع قوي مالوش سحنة اليهود, بس بصراحه من الاخر احلى حاجة الجيبات القصيرة اللي مبينها رجليها المليانة و جمال .....عودها الملفوف, بصراحه ستات مصر كلها بتدعيلك وفرتي عليهم تمن الفياجرا و بقوا يخلوا اجوازهم يتفرجوا عالمسلسل

5- إيزاك بصراحه احسن من مثل في المسلسل دة من حيث الشكل و الأداء و اللكنة, فعلا يهودي أصلي زي ماتعودنا نشوفهم في مسلسلات أبهاتنا و جدودنا...... الله ينور

6- ضابط المخابرات المصرية اللي طول المسلسل واقف في الشباك وماسك الووكي توكي و بيكلم هشام سليم
مافيش حد بيراقب حد في الدنيا بالهبل دة (لامؤاخذة) طيب اتدارى شوية ورا ضلفة الشباك او ستارة انما واقف طول المسلسل متدلدل في الشباك من دور اول او تاني و هما قدامك بيقوللهم انا براقبكم دة لو عيل في ابتدائي كان يعملها احسن من كدة
و بالمناسبة الووكي توكي الموتورللا اللي ماسكة موديل اواخر التمانينات مكانوش اخترعوة في الستينات و لا السبعينات

7-صندوق فاضي في عربية نص نقل لزومة اية اربعه قاعدين حوالية بيحرسوة و هو في صندوق النص نقل؟؟؟ لفت انظار يعني!!! و صندوق متر و نص في متر و نص لية انشاء اللة هيه منة شلبي حاتأجرة أوضة و صالة و عفشة ميُة

8- الاخطاء الفنية بقى ماتقولش, مش حانتكلم عن الساعات ولا النضارات و لا الازياء اللي ماتمشيش ابداً مع موديلات الستينات و السبعينات, بس كفاية العربيات الرينو و الفورد و الاودي اللي موديلات من 77 ل 85 و المسلسل كلة قايم عليها حتى المرسيدس بتاعه لويز موديل فوق ال78
هيه اوروبا كانت سابقة عصرها يمكن وقتها كانت العربيات دي عندهم قبل ما تنزل مصر بعدها ب20 سنة

دي ملاحظاتي على حلقتين او تلاتة شفتهم و منهم فهمت المسلسل من الاول للأخر طبعا مسلسل ممطوط و سيناريو متزود قوي علشان يعمل تلاتين حلقة و هو اصلا مايعملش اربعتاشر حلقة بس علشان يتباع للتليفزيونات و يجيب فلوس كويسة
والله العظيم حرام اللي اتصرف عالمسلسل دة و التصوير في اوروبا علشان يطلع بالشكل العبيط دة الفلوس دي كانت اتصرفت عالغلابة او المنتج يزكي بيها لمستشفي 57357 كان احسنلة و احسنلنا
لكن الظاهر كانوا فاكرين انهم حايعملوا مسلسل من الروائع زي رأفت الهجان او دموع في عيون وقحة اللي كنا في السبعينات وبرغم اختلاف الزمن و قلة الامكانيات كان روعه

لفت نظري ان المسلسل اخراج نادر جلال ؟؟؟؟؟ و سيناريو بشير الديك ؟؟؟؟؟
مستغرب ان الناس دي ليها تاريخها و سمعتها و شهرتها و تعمل فيلم بالسطحيه و السذاجه دي!!!
سامحوني انا استعملت اسامي الممثلين في الادوار مش اساميهم الحقيقية علشان في الحقيقة معظهم من معروفين بالنسبة لي عالاقل, لأني و زي ماقلتلكم في الاساس مش متابع جيد للتليفزيون